Folketingimut qinersineq 2022

Kunngeqarfik Danmark-ip nunatsinni susassaqarfiit 33-t suli oqartussaaffigaat. Pisussaaffeqarpullu susassaqarfiit taakkua nunatsinnut naleqqussartuarnissaat malinnaatilernissaallu. Kunngeqarfik Danmark-ip taamatut pisussaaffeqarnera isumaqarpoq naleqqussaanerit malinnaatilernerilu akiligassarigaat. Ulloq manna tikillugu inuussutissalerinermut oqartussaaffik (fødevareområdet) nunatsinnut naleqqusarneqaranilu malinnaatilerneqarnikuunngilaq. Kingunerivaalu nunatsinni pisuussutitta pingaarnersaat, aalisagaq, nunatsinniik avammut toqqaannaq niuerutigisinnaanagu. Kingunerivaalu Kunngeqarfik Danmark-ip nunatsinni inuussutissalerinermik oqartussaaffik oqartussaaffigimmagu, nunatta aningaasaqarnikkut ineriartorsinnaanera killilersoraat. Uanga folketingimut iseruma sulissutigissavara inuussutissalerinermut […]

Ersarissumik oqaatigissavara: Kikkut tamarmik Kalaallit Nunaanni najugaqartut naligiittumik katsorsartissinnaasussaapput. Ajoraluartumik Inuit Ataqatigiit Folketingimi ilaasortaatitaat Avannaani qineqqusaarnitsinni eqqunngitsunik kanngunartumillu oqaaseqaqattaarpoq. Inuit Ataqatigiit Folketingimi ilaasortaatitaat ilumuunngitsumik oqaqattaarpoq Naleraq uangalu isumaqartugut kalaallit kisiisa nakorsiarsinnaassasut, namminerlu eqqaavaa DNA-test-erineq ingerlanneqartassasoq. Aali uanga tamakkua ataasinnguamilluunniit taanikuunagit. Toqqaannartumik piaarisumillu uukapaatitsiniarsarivoq, arlaleriarlungami sorsuutigerusutakka suunersut ersarissaraluarlugit. Massa oqaatsikka nammineq danskisut nutseraluarpakka oqariartuutikka paasilluarnissai qulakkeerusullugit.