Pilersuisoq amiilaarnartunik isorliunerusuni akigititaqarpoq

Allattoq: Emanuel Nûko, (N)

Kalaallit Nunatsinni avinngarusimasuni Pilersuisoq amiilaarnartunik akeqartitsinera unitsinneqarli, naammalerluinnarpoq unammillerfiunngitsunik amiilaarnaqisunik akinik akeqartitsineq Pilersuisoq innuttaasut kaasarfiinik imaarutitsiniarnersua unitsinneqartariaqarluinnarpoq, taamannaannaq sinneqartoornerit ingerlapput. Ila Nuummut sanilliullugu inuussutissat akii minnerpaamik pingasoriaammik akisunerupput sunaana peqqutaasimasoq?

Naalakkersuisunaa innuttasi naalliupput ilungersungaarlutik inuuniapiloortut qiviarsigit, KNI pisisartusi ilungersungaaqisut isigisigit artorsartut inuuniapiloortut oqilisaaviginiarsigit sinneqartuupilorujussuartarnersi apparsarniarsiuk artorsaraluttuinnarput innuttaasut.

Naalakkersuisut siulittaasuat innuttatit takukkit aningaasaqarnerminnut artorsaraluttuinnartut inuuniarnermikkut ilungersungaarlutik pisut, inuussutissat akii avinngarusimasuni amiilaarnarsigaluttuinnarput innuttatit qiviarlugit takukkit.

Naalakkersuisooqatigiit IA Siumut inuit Pilersuisoqarfimmiittut takusigit artorsaqisut, akit amiilaarnarsigaluttuinnarput Pilersuisumi innuttaasut nipeqanngitsumik nilliapput.

Avanersuarmi Nunattalu Kangiani piniartut ajalusooqqapput piaartumik iliuuseqaritsi ikioqqupput, takornarialerisuuppata ingerlaannartumik million-ilikkaanik tapiipallassagaluarpusi, piniartortagut ilungersungaaqisut qiviarsigit.

Inuuniapiloornermi artorsarnermi ilungersungaarnermik inuunillit qiviarsigit naalliungaaqisut iliuuseqarfigisigit, kinguneri sakkortusaqisut isiginnaaginnarneqarsinnaanngillat.

Kingunerlutsisuunerusarput taama nalaataqartut inuuniarnermikkut ilungersortut angummassinnaajunnaartut, tillinniarnerit, asersorterinerit, inooqatigiinnermi ajutoornerit, imminornerit, sumiginnagaanerit, imigassamik aanngaarniutinik atuilernerit allarpassuillu taakkartorneqarsinnaasut.

Naa ukua 66 % angullugu tunuliaqutillit innuttaasut naallioqisut isiginnarneqarsinnaanngillat.

Inussiarnersumik Inuulluaqqusillunga

Emanuel Nûko, Naleraq

+299 22 03 72