Inuiaqatigiit suliffeqarfiutaanni Royal Greenland-mi ukiorpanngorput anguniagaalluni Kilisaatini inuttaasartut aqumiut pinngitsooratik kalaalinngortinneqarnissaat. Tassa politikkikkut eqqartuinnarnagu piaartumik maannakkut naammassisariaqalerpoq. Upernaaq manna Royal Greenland ileqquusumik ataatsimeersuarmat Ineqarnermut angallannermullu Naalakkersuisoq avammut ataatsimeersuarnermi Naalakkersuisut sinnerlugit nalunaaruteqarpoq piaartumik aqummiut tamarmik Royal Greenland-p kilisaataataaniittut kalaalinngortinneqassasut.
Inuiaqatigiinnut asuli tusaqqusaarluni taamatut nalunaaruteqarneq akuersaanngilluinnarlugu nalunaarutigaarput. Tassami massakkumut sumilluunniit timitaliinissamik malunnartunnguaqanngimmat. Tassami taamatut ataatsimeersuarnermi inuiaqatigiinnut nalunaaruteqaraanni piaartumik timitalimmik naammassineqartussaagaluarpoq, kisiannili tamanna massakkumut pinngilaq taamaattumik piaartumik aqumiut kalaalinngortinneqartariaqalerput.
Naalakkersuisut qaa ersarissumik takutitsisariaqarpusi, asuli oqaasiinnarmik sulisoqarsinnaanngilaq. Aalisarnermut piniarnermullu Naalakkersuisoqarfik Naalakkersuisorlu, minnerunngitsumillu Naalakkersuisut siulittaasuat ataatsimeersuarnermi suliniutinik naammassinnittussaq aamma eqeersimaanerusariaqalerpoq. Inuttalersuinermut tunngasut Nalunaarutit piaartumik suliaralugit atuutilersissallugillu.
Taamaattumik piaartumik ersarissumillu nalunaarutigisariaqarpaat kalaallit kilisaatersortut
amerlanerpaat inuiaqatigiit suliffeqarfiutaanni aqumiutut ingerlatsisariaqalersut Naalakkersuisut nalunaartariaqalerput oqaasiinnaangitsumik asulilu tusaqqusaarutaanngitsumik.
Ullumikkut 13.11.2022 suli massakkumut Naalakkersuisut sumilluunnit anguniakkaminnut tutsaqanngillat aqumiut tamarmik kalaalinngortinneqarnissaanik taava naak aalajangersukkat piginnittuni. Royal Greenland siulersuisu piginnittut kissaataannut piumasaannullu naammassinnittariaqalerput.
Inuiaqatigiit aningaasarsiornikkut ingerlalluassagutta nammineerluta maani ingerlassinnaasagut ingerlattariaqalerpagut. Inuiaqatigiinnilu pisuussutitta uumassusillit aningaasartaasalu nunami maani nunaqavissunut nuullugit kaaviaartittariaqalerput asuli isiginnaartuinnartut piunnaarluta.
Inuulluaqqusillunga
Hans Enoksen
Inatsisartunut ilaasortaq, Naleraq