Tasiilami pilersuisoq maanna imaarulluinnartutut taasinnaanngorparput, aasaq manna qassissaannik umiarsuaqaraluarpoq inuiaqatigiillu atorfissaqartilluinnagaat maanna takussaajunnaavissimapput. Inuiaqatigiit pingaartitaat pinngitsoorsinnaanngisaallu amigaatigaagut, aasaq maj naalernerani imaluunniit juni aallartilaarnerani umiarsuaq siulleq tikippoq tassanngaaniillu qasseeriarluni Tasiilamut apuuppoq kisiannili inuussutissat eqqiluisaarnermut atortut amigaatigeraluttuinnarpagut.
Royal Arctic Line pisuutinniarsariinnarneqarsinnaanngilaq aatsaammi qanittumi taanna ajutoorpoq, kisiat eqqarsaatiginineqartariaqarpoq qaammatini taariikkannik maj naalernera aamma juni aallartilaarneraniilli umiarsuaqaraluarpugut pisiniarfipput immernikuunngilaq maanna nunnguutilluinnartutut taasinnaalerparput. Niuerluanngitsoqartoq pasitsaannarsivoq apeqqusersuisariaqalerpugut akisussaasunut Pilersuisoq Tasiilamiittunut, ukiuni kingullerni Pilersuisoq Tasiilaq amigaateraluttuinnarpoq pisisartut atorfissaqartitaat tikisinneqassaarput taamaallaat innuttaasut ataasiakkaat tikisinneqartalerlutik tamanna ajorluinnarpoq, soorlu saqqummiunneqartartut imaakkajupput inuit oqallittarfiisigut innuttaasuni ataasiakkaanik qaaqqusisarput suna Tasiilami amigaatigineraat paasiniarlugu tamanna pissusissamisuunngilluinnarpoq akuersaarneqarsinnaanani, atorfissaqartinneqartut tamaasa tikisiortorneqarsinnaappata pitsaanerpaassagaluarpoq inuit ataasiakkaat atorfissaqartitaat pinnagit.
Naammalerpoq inuussutissatigut eqqiluisaarnermullu atortunik amigaateqarnerput, inuit ulluinnarsiutaat assersuutaasinnaapput nerisassat nillataartut qallersuutissat assigisaallu aasaq manna tamaat takunngilarput, aappaattut assersuutaasinnaapput equutissiat pisiniarfitsinni takussaanngilluinnarput, inuiaqatigiillumi ullut tamaasa atorfissaqartitaat amiilaarnartumik akitsuartuinnapiloorput pisinnaasarpullu annikilligaluttuinnarluni.
Innuttaasuusugut qanormita inuussutissaqassuugut januari 2024 aallartinnerani umiasuaqassaarpat aasap tungaanut pisiniarfipput imaarussimaannarniarpat, Naalakkersuisut piniartuni aningaasaliisariaqarput piniakkanik killilersukkanik piniarsinnaanngorlugit innuttaasunillu pilersuisussanngortillugit piaartumik, ernumanarpoq pisiniarfipput januareqaannalersoq imaarutivissappat.
Innuttaasut tusarusupput Brugseni aamma Pisiffik Tasiilami immikkoortortaqarfeqalersinnaanerinut qanoq isumaqarnersut taakkua suliffeqarfiit, Pilersuisoq kisermaassinera Tasiilami inuiaqatigiinnut amiilaarnartunik inuussutissat akiisigut akeqartitsivoq, innuttaasuni pissakinnerpaanik ilungersornerpaani inuuniarnermikkut aalisarfigai tamaviaarlutik aningaasaataannik.
Sooq imigassamik ajornartorsiorneq annertua? Sooq iniminni annaasaqartut amerlappat? Sooq Meeqqaminni arsaagaasartut amerlappat? Sooq meeqqat atugarliuutillit amerlappat?
Peqqutip anginerpaartaraat inuuniarnitsinni ilungersungaarnerput annertungaarmat nukissaalatsinneqartugut inuussutissanik angummanniapiloorneq allarpassuillumi naalliutitaalluta
malugaarput pisortanit qanoq aningaasanik qalooriffigineqarsinnaalluta kisermaassisussaatitaanerup aqqani.
Inussiarnersumik Inuulluaqqusillunga
Inatsisartuni Ilaasortaq
Emanuel Nûko, Naleraq
Mobil: 220372