Ulluunerani paaqqinnittarfiit ingerlalluartut ullutsinnullu naleqqulluartut pingaaruteqaqaat ilaqutariit ilinniartullu ikorfartussagutsigik. Imatut paasisariaqarpoq, ulluunerani paaqqinnittarfiit ilaqutariinnut ikorfartuissammata, meeraaqqeriviit meeqqeriviillu pingaarnersiunermi pilersaarusiorluakkamik aallaaveqartumik qanoq iliuuseqarfigineqartariaqarput ilaqutariinnut iluaqutaasussanngorlugit qulakkeerinniffigalugit.

Taamaammat Naleqqap kissaatigaa sulissutigissallugu meeqqat paarineqarnissaannut qularnaveeqqusiisoqassasoq sumiiffinni ulluunerani paaqqinnittarfinnik annertuumik atorfissaqartitsisunut pisariaqartitsisunullu. Taamaaliornitsinni qulakkiissavarput pisortat meeqqanik paarisassanik innersuussisassasut aamma paaqqinnittarfinnut namminersortunut nakkutiginnissasut, taakkumi pisortat paaqqinnittarfiinut toqqagassatut ilaanerat pitsaassusermik ajunngivissumik qaffassaaqataasussaammata.