Sulisartukkut naapertuunnerusumik pineqartariaqarput.
Nunarput aningaasarsiornikkut ingerlalluarnerarlugu Naalakkersuisut oqariartoqattaarput. Sulisartut pineqalermata akissaqaratik oqaluleriataarput, taava piviusoq sumiippa?
Naalakkersuisut massa inuiaqatigiit suliffeqarfiutaanni siulersuisuinut apeqqusiinngivillutik 750.000 koruuninik akissarsiaqartilerlugit, kvart million-inik qaffaaffigeriarlugit, sulisartortagut ilaatigut suunngivissunik aningaasanik neqeroorfigalugit.
Taamatut Naalakkersuisut pissusilersornerat tapersersunngilluinnarpara. Ilami sulisartunut sapaatip akunneranut 40 koruunit ataallugit neqeroorput, tassa 1 procent inorlugu qaffaaniarpunngooq. 1 procent inorlugu, aali ukioq ataaseq isumaqatigiinninniarnerit kinguaattooqqasut, inuit akissarsiassarigalui nalimmatinngilereersut.
Aali akissarsiassaannut isumaqatigiissut 2014-imi atuutilermalli, nerisassat akii 11 procent-imik agguaqatigiisillugit akitsornikuusut (10,9%).
Tamanna akuersaarneqarsinnaanngilaq, sulisartut nikussaassappata tupigineqarsinnaanngilaq. Partii Naleqqamiik sulisartut taperserpagut.
– Hans Enoksen
