Siammarteruk

Tusagassiorfinnut nalunaarut

2018 ukiaaneraniilli nunatta aqunneqarnera patajasimaqaaq. Namminersornermut inatsilli atuutsilermalli ernumanaqaaq kisitsisinngorlugu Naalakkersuisut qassiq, Inatsisartuni amerlanerussutillit tatiginninnatik takutitsisarsimanerat piffimmi kingullermi.

 

Partii Naleqqami Inatsisartuni ilaasortavut tamarmik Naalakkersuisnermik misilittagaqarluta, unamminarsimavoq illuatungiliuttuulluta Naalakkersuisut sulisinnaatinniarlugit periarfissiisarneq. Pingaaruteqarpoq periarfissiisaraanni aamma akisussaatitsisarnissaq piffissanngoraangat, inatsisit unioqqutinnginneqarnissaat qulakkeerniarlugu. Sualummik Naalakkersuisutut akisussaaffik unioqqutikkaanni.

 

Piffimmi kingullermi mittarfissuit initusimaqaat. Sualummik naalakkersuisuutitaqartut akunnerminni Kangerlussuup pingaaruteqarunnaarsinneranut avissaartuutiginikuullugu. Imaluunniit toqqaannarnerusumik taallugu, matunissaanut suliniutiminnik.
Partii Naleqqami ersarissumik isornartorsiorsimavarput inuiaqatigiinnut iluanaarutiginiarneraartussaanerarlugit suaarutaasimanerat. Tamanna ineriartortitsinermut akerliunerunngilaq, kisiannili nunatsinnut iluanaarutaassannginerat innuttaasunullu ataqatigiissaarinnginnerannik tunngaveqarpoq. Sualummik nunap inui aallaaviginagit suliniuteqarmata, ataqatigiissaarinnginnerat ersersarneqarneruvoq.

 

Aningaasaqarnermut Ataatsimiititaliamiit peqqussut, Munch-gruppilu atsioqatigiinnissaq kinguarteqqullugu, Naalakkersuisuniit malinneqanngikkaluartoq Partii Naleqqamiit ikinnerussuteqarlutik Naalakkersuisuutitaqartut tapertaasalu qisuariarnissaat utaqqisimavarput. Naak ataatsimiititaliani arlalinni pisariaqanngitsumik matoqqatillugit ingerlanneqartartuni, Partii Naleqqamiit naaperiaasarsimagaluarluta killeqartariaqarpoq akuersaagassaq

 

Arlaleriarluta paasissutissanik apuussiffigineqareerluta Inatsisartut ataatsimiinneranni aammalu pisarnersut matoqqasumik isumasioqatigiinnerni, piffissanngorpoq inuiaqatigiit paasitinnissaat partiitut killiffitsinnik.
Maluginiarsimavarput tunuliaqutserneqarpasinnatik Naalakkersuisut Karl Frederik Danielsen aamma Ane Lone Bagger, danski illersornissaqarfiallu atsioqatigiissuteqartut. Sualummik maluginiarsimavarput Karl frederik Danielsen-ip oqaasii, piviusut akerlilerlugit oqariartortoq.
Soorunami ilumoorsinnaangitsoq Inatsisartut aammalu inuiaqatigiit takunikuunngisaannik isertuussamik atsioqatigiissuteqartoq, minnerunngitsumillu eqqunngimmat oqariartuutaa Kangerlussuup siunissaa qulakkeerneqarneraarmagu.

Naalakkersuisut Kangerlussuup piuaannartinnissaa soqutigisarinngikkaat, mittarfissuarnut inatsilli akuerineqarmat ersarissimaqaaq, ikannerussuteqarallartillutik akuerisariaqagaq.
Kisianni Naalakkersuisut tusagassiorfinnut eqqunngitsumik paasissutissiinerat Kangerlussuup siunissaa qulakkeerneraarlugu, inuttaasunut Inatsisartunullu eqqunngitsumik paasissutissiinerullunilu salloqittaanertut nalilerneqarsinnaavoq.

 

Sualummik paasissutissat isertuussanngorlugit ataatsimiititalianut kisiat apunneqaraangata, naatsorsuutigisariaqarpoq Inatsisartuni ilaasortat ataatsimiititalianiinngitsut oqariartuutit upperineqartariaqartut. Maanna qujanartumik isertuussineq killeqarsimalluni saqqummiussinerup tungaanut.
Aamma maluginiaqquvoq Partii Naleqqap naliliisimanera eqqortuusoq, Nuup aamma Ilulissap mittarfissuartassaata Kangerlussuaq paarlassinnaanngikkaat. Taamaakkaluartoq Naalakkersuisut inuiaqatigiinnut kingunissaa nalilersoqqinnissaa pinaveersaaraat malunnarpoq, imminut akilersinnaassusaanut takussutissaarunnera.
Tamatigut Naalakkersuisut Kalaallit Airports imminnut aningaasarsiornerannut naliliinerat innersuuttuarpaat, naak taakku nassuerutigereeraat inuiaqatigiit sullinnagit selskabslov malillugu ingerlatsinerartut.
Tassami inuiaqatigiinnut akilersinnaassutsimut kisitsinerit akisussaaffik aningaasaqarnermut pisortaqarfimmiippoq. Tassanngaannilli oqariartuut ersareqaaq: Inuiaqatigiinnut kingunissaa soqutaanngilaq, aalingeereerpugut kingumut qiviarnianngilagut!

 

Ajoraluartumik kingunerisussat allanngorsimaqaat. Inuiaqatigiinnut pingaaruteqaqaaq Kangerlussuaq heliportiunaniluunniit maanna siunissami sakkutooqarfittut atorneqarnissaa. Innuttaasut akilersugassaat, illersornissaqarfiup timmisartut mittarfittavia kisiat akilersussagamikku.

Sianiinaarterujulluta nunatta pingaarutaa Danmark piginnittunngorlugu oqartussaatilerparput Nuummi, Ilulissani aammalu Kangerlussuarmi. Taamaasinikkut ”Grønlandskort” akeqanngitsumik tunniutiinarlugu. Naalgaaffinngornissaq piumanngikkipput suaarutigiinnarsimagunikku assigiinnarpaa.

Taassuma saniatigut nunatta karsianut kingunissaa akisinnaajunnaarnikuullugu Kangerlussuup ammatiinnarnissaa sakkutooqarfittut, maanna uagut kisitavut aallaavigalugit takusinnaavarput Kalaallit Airports suliaat inuiaqatiginnut 1.3 aamma 1.8 milliartit akornani ajunaarutaasussanngortoq.

Soorunami tupassutaanavianngilaq Naalakkersuisortaartoqassappat danskit piginneqataassutaat Kangerlussuarmiissinnaanerallu unitsinneqarnissaa naatsorsuutigineqarsinnaasoq. Kisianni pisariaqanngitsumik akeqqiussinissamik kalaallit aamma naalagaaffeqatigiiffimmik illersuisut akornanni pilersitsisoqaannarnissaa pinngitsoorneqarsimasinnaagaluarluni. Inuiaqatigiit akornitsinni aporaffissaliortariaqanngikkaluarput.

 

Maanna Naalakkersuisut tapertaasalu Kangerlussuaq piuaannartikkusunngikkaat ersarissereermat, nalilerneqareerlunilu Qeqqata kommunia piginnissinnaannginnera Kangerlussuarmik illersornissamut atorneqassammat, apeqqutissaraluit ilarivaat nunatta karsiata aningaasat qassit atussamaarneraat Kangerlussuarmi. Sualummik illersornissaqarfik timmisartut miffissaanut kisiat aningaasaliisussaatillugit

Apeqqutit tamakku assigisaallu ataatsimiititaliani qaqittarsimagaluarlugit takusinnaalersimavarput Naalakkersuisut Kangerlussuup ineriartonissaanut akissuteqarusunnginnerat. Maannalu avammut nalunaarutigisartagaanni pisortat akiligaannik aserfatsaaliineq ineriartortitsinissarlu naatsorsuutigineqassanngitsoq takusinnaalerparput.
Naalakkersuisut Kangerlussuarmi najugaqartut kisimi annerusumik angalasuusarnissaannik, nunattalu iluani kisiartaanerusumik tikittaqarnissaa ukiumut katillugit 9.600 angalasussat naatsorsuutaat, ullumikkut angalasut ukiumut 160.000 pallillugit amerlassusillit, Kangerlussuup matuneranik nalilerneqarsinnaavoq. Sakkutooqarfinngornertut naliliinnagassanngorlugu.

Naalakkersuisoq Karl Frederik Danielsen tusagassiorfinnut eqqunngitsunik paasissutissiigaangat, Kangerlussuup aserfallatsaalinissaanut siunissaanullu qulakkeerinnissisimasoqarneraarlugu kinguneqartariaqarpoq. Periarfisseeqqaarsimagaluarpugut isumasioqatigiinnerit arlallit ingerlaneranni paasissutissanik saqqummiisinnaaneranut. Kisianni soorunami piaaraluni eqqunngitsumik paasissutissiisimanikuulluni paasisaagaanni naammanngilaq ”erseqqissaammik” nassiussissalluni. Kinguneqartitsinnginnermullu naammannani aatsaat paasisaagaanni nassuerneq eqqungitsumik piaaraluni paasissutissiisimalluni.

Tamakku pisut ilalernagit Naalakkersuisoq Karl Frederik Danielsen-imut tatiginninnginnermut taasititsinissamut tunngavissiigaluarput, Partii Naleqqamiillu naaperiaasarsimagaluarpugut ujartorniarlugu suut peqqutaasimassagaluarnersut eqqunngitsumik paasissutissiisimaneranut, peqquteqavissoqarsimassagaluarnersoq. Iluatsinnaguli.

 

Akerlianilli maluginiarsimavarput Naalakkersuisoq Karl Frederik Danielsen arlaleriarluni eqqunngitsumik paasissutisseeqqittarsimanera, ilaatigut Inatsisartut ataatsimiinneranni. Soorunami akuersaarneqarsinnaavoq qaammaasakinneq aallavigalugu oqariartuuteqartoortarneq, kingorna naqqinnerqarpata paasissutissat pissarsiarigaanni.

 

Ajoraluartumilli Naalakkersuisoq Karl Frederik Danielsen-ip Inatsisartuni ilaasortat ataasiakkaat kisiisa paasissutissanik tuniorarsimagai, Inatsisartuni sammineqartut.

Naliginnaasumik naluneqanngilaq Naalakkersuisut Inatsisartunut paasissutissiigaagamik ilaasortat naligiimmik pisassagaat. Taamaakkaluartoq Naalakkersuisoq apeqqarissaarneqarnermini soorlulumigooq tamakku soqutiginagit ingerlarsortoq. Aali Inatsisartuni ilaasortat ammasumik oqalugiartarfimmiit paasissutissanik apuussiffigineqarnertik eqqartoraat.
Paasissutissat Inatsisartuunut sinnerinut apuussorneqanngitsut suliassap suliarineqannginnerani, aatsaat oqalugiartarfimmiit tusaasinnaalerlugit.

 

Naalakkersuisut eqqunngitsumik paasissutissiigaangata tupinnartuusussaavoq, ajoraluartumillu maluginiarsimavarput soorlulusooq inuiaqatigiit sungujutiinnaraat. Politikerinik qatsussuneq annertusisarpoq issiaviit kialaartut partiiniit pingaarnerutinneqaleraangata, eqqunngitsumillu iliuuseqarneq akuersaarneqaleraangat.
Taamaasinikkut partiit innuttaasunut sullissiunnaarlutik, imminnut sullissilersimasarput. Demokratiilu tunngavissaarulluni.

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt