Siammarteruk

Tusagassiutitigut nalunaarut

Mittarfiit

Tusagassiuutini kiisalu § 37 naapertorlugu Naalakkersuisunut apeqquteqaatini ersarippoq Kalaallit Airports Naalakkersuisullu inuiaqatigiinnut erseqqissumik oqaatigiumanngikkaat mittarfissualiortiternissat qanoq akeqassanersut, aammalu suliap ingerlanneqarnera paasissutississutigiumanagu.

Taamaammat Partii Naleqqamiit isumakulunnartoqartipparput Kalaallit Airports-ip suliffeqarfittut mittarfiliortitsiniarneq anguniagaat aammalu Naalakkersuisut oqariartuutigisaat Kangerlussuup siunissaa pillugu imminnut ataqatigiinnginnerat. Sualummik inuiaqatigiinnut aningaasarsiornerannut qanoq kinguneqarnissaat eqqarsaatigalugu.

Kommunit Namminersorlutillu Oqartussat missigersuutaat naatsorsuutaallu pillugit Inatsisartut Inatsisaat nr. 26, 28. november 2016-imeersoq naapertorlugu §1-imi imatut allaqqasoqarpoq:

  • §1. Inatsit atortussaatinneqarpoq kommuninut aamma Namminersorlutik Oqartussanut, taakkununnga ilanngullugit ingerlatsiveqarfinnut, naalakkersuisoqarfinnut, paaqqinnittarfinnut, suliffeqarfinnut il. il., taakku missigersuutaat kommunit ukiumoortumik missigersuutaannut imaluunniit Namminersorlutik Oqartussat aningaasanut inatsisaannut ilanngunneqarsimappata.

Kalaallit Airports-ip missigersuutai annertunerpaatigut Namminersorlutik Oqartussat aningaasanut inatsisaanni ilaatinneqarmata, nunatta karsianiit suliffeqarfimmut inuiaqatigiit aningaasataannik 2.1 mia. kruuninik annertussusilinnik pinngitsaaliissummik nuussisoqarnissaa, kinguneranik suliffeqarfik pisussaaffeqarpoq inuiaqatigiinnut iluanaarutaasumik suliuniuteqarnissaa.

  • §6. Naalakkersuisut inissianut, inuussutisssarsiutinut attaveqaatinullu suliniutinut aatsaat taarsigassarsisinnaallutilluunniit taarsigassarsinissamut akuersisinnaapput, atuisut akiliutaat, pisortat aningaasartuutaasa annikillisat pisortalluunniit kinguneqaatitut isertinneruligassaasa minnerpaamik taarsigassarsiamut atasumik erniat taarsersuutitullu akiliutit matussusersinnaappatigit. Taamattaaq aningaasaliissutit taaneqartut ungasissumik isigisumik aningaasarsiornermut politikip attanneqarsinnaaneranut ikorfartuisuussapput.

Uani erseqqilluinnarpoq Kalaallit Airports pissutsit aalajangersakkat iluanni aatsaat aningaasanik nunatta karsianiit pisinnaammat, tassanilu aamma ilaatinneqarpoq siunissaq ungasinnerusoq eqqarsaatigalugu aningaasarsiornermi politikikkut imminut nammassinnaasumik ingerlatsisoqarnissaa eqqarsaatigalugu.

Eqqarsarnartoqartipparput Naalakkersuisut kiffartuussinermut isumaqatigiissutit eqqarsaatigalugit misilittakkat ilinniarfigisimanngimmatigit, taamanikkummi Naalakkersuisoq pinasuartumik isumaqatigiissummut akuersilluni atsiupallassimavoq, inuiaqatigiinni isumaqatigiissutissamut akerliusut amerliartuinnalermata. Tamatumalu kingunerisaanik kiffartuussinermi isumaqatigiissutit pissutsinut nappertuutinngilluinnartut atuutinneqalermata, innuttaasut sallunaveeqqutitut inissinneqarlutik, tassani Naalakkersuisut tunngavilersuutigalugu isumaqatigiissutit atsiorneqareersimasut allanngortinneqarsinnaangitsut. Periuserlu tamanna Nalaakkersuisut suli illersorniarsaraat.

Maanna Kalaallit Airports oqariartuuteqarpoq Inatsisartut inuiaqatigiillu sanaartugassat akiannik ammasumik nalunaaruteqarniaratik, utoqqatsissutigalugulu isumaqatigiissutit suli atsiorneqarsimannginneri.

Tamakkiisumik isigalugu mittarfissarsuit sanaartorneqarnisai inuiaqatigiit aningaasarsiornerannut kingunissaa eqqarsaatigalugu oqariartuutit pissutsinut piviusunut naapertuutinngimmata, saneqqussiinaanngilarput Kalaallit Airports-ip suliap ingerlanneqarnera aqussinnaaneraa apeqqusissallugu, taamaattumillu Partii Naleqqamiit suliap ingerlanneqarneranut atatillugu mianersoqqussuteqartariaqarluta.

Mianersoqqusineq sulliffeqarfimmuinnaanngilaq, taamatullu Danmarkip naalagaaffia suliffeqarfimmi aalajangigassanut kisimiikkaluarluni naaggaarsinnaatitaagami oqartussaasuittut oqaatigineqarsinnaasunut taamatut erseqqissaasariaqarluta, taakkulu saniatigut aamma Munck gruppimut mianersoqqussutigisariaqarparput isumaqatigiissummut suli aningaasaliivigineqanngitsumut atsiornissaat, tassami inatsisit malillugit aningaasaliinissaq qulakkeerneqassammat..

Tamanna tunngavigalugu Partii Naleqqamiit Naalakkersuisut kiisalu Danmarkip naalagaaffia piumaffigissavarput uppernarsaqqullugu isumaqatigiissutip atsiorneqarnera atuuttussaatinneqassanngippat Munck gruppi taarsiivigineqarnissamik piumasaqarsinnaannginnera qulakkeerneqarnissaa. Tamatumalu saniatigut aamma Kalaallit Airports-ip nioqqutissanik niuertartut allat aamma isumaqatigissuteqarfigisimasaat aamma taamatut qulaajaaffigineqarnissaat.

Tamanna tamakkiinerusumik isigalugu Kalaallit Airports-ip sanaartugassat pillugit inuiaqatigiinnut aningaasarsiornertigut kingunerisassaa pillugu nassuiaateqarnerminni erseqqissaatigaa Kangerlussuarmi mittarfik 1500 meteritut takitigisoq ukiut 25 ingerlanerini  98 mio. kruuninik iluanaarutaassasoq, kiisalu Kangerlussuaq qulimiguulinnut mittarfinngortinneratigut inuiaqatigiinnut 619 mio. kruuninik iluanaarutaanissaa naatsorsuutigineqarluni.

Tamakkununnga ilanngullugu Naalakkersuisut ammasumik oqariartuutigaat Kangerlussuarmi mittarfiup atorneqarnera allanngortinneqassanngitsoq, taamaattumillu maannakkutut 2810 meterisut takitiginera allanngortinneqassanngitsoq, tassungalu ilanngullugu oqaatigalugu mittarfiup aserfallatsaaliorneqarnissaa 705 mio. kruuninik akeqassasoq.

Taamaasilluni Kalaallit Airports-ip sanaartortitsinissamut tunngatillugu inuiaqatigiit aningaasarsiornerannut kingunerisassaanut naatsorsuinera amingartoorutaasutut inissimmat, Kangerlussuup mittarfiata aserfallatsaalior-neqarnerata akilerneqarnissaa karsimik arlaanniilluuniit akilerneqarnissaa eqarsaatiginagu. Kangerlussuup qulimiguulinnut mittarfittut atuutsinneqalissanngippat ukiut 25-it ingerlanerini aningaasartuutit akilereerlugit 98 mio. kruuninik iluanaarutaanissaagalua maanna minnerpaamik -609 mio. kruuninik amingaartoorutaanissaa naatsosuutigineqarsinnaasoq ersersinneqarpoq.

Maanna aamma erseqqissivoq Nuummi mittarfissap sanaartornera eqqarsaatigalugu aqqusernit allanngortiterneri ilanngullugit suliarineqarniartut, akerlianilli Ilulissanni illoqarfiup aqqusernanut pioreersumut atassusiinissap kisiat suliarineqarnissaa siunniunneqarluni, taamaattumillu kommune mittarfiup tungaanut nammineq akiliilluni aqquserniortariaqarluni. Tamanna periuserineqartoq bilag 6-2-imi mittarfiit pillugit inatsip suliarineqarnerani innersuusssanut allassimasunut naapertuutinngilluinnarpoq, tassami apeqqummut 3-mut tunngatillugu Naalakkersuisup erseqqilluinnartumik oqariartuutigaa kommunet aqqusernit sanaartorneqartussat nammineq isumagissagaat, tassalu Ilulissani Qaqortumilu mittarfiup tungaanut aqqusernit nammaqatigiinnerup aqqani kommuneni tamani aamma nammineq akilissagaat.

Tusatsiakkat naapertorlugit paasinarsivoq kommunet pineqartut Kommune Kujalliup kiisalu Avannaata kommuneata tamanna aningaasassaqartinngikkaat, taamaattumillu aningaasartuutissat nunatta karsianiit nammanneqarnissaat naatsorsuutigigaat. Soorlu Nuummi aamma taamaaliortoqartoq.
Inuiaqatigiit aningaasarsiornerannut kingunissaanik misissueqqissaarneranni innersuussat tunngavissaarupput, taakkulu Kalaallit Airports-ip atuutiinnarnissaanik isumannaarisuusimasussaagaluarput.

Naalakkersuisut aammalu partii tapersersortaat tunngaviusumik aalajangiussanik, soorlu Namminersorlutik Oqartussat missigersuutaat pillugu inatsimmik, qarsuataariinnarnerat qisuariarfigineqassanatik ingerlaannassappat, tamanna akisussaassuseqanngilluinnartumik ingerlatsinerussaaq. Politikkikkut aamma aningaasanik ingerlatsinermik.

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt