Siammarteruk

Tusagassiorfinnut nalunaarut

Qaammatini kingullerni paasissutissat pissarsioriortorneqartut malillugit Partii Naleqqamiit isumaqarpugut tamanna qanoq isumaqarnersoq nalilersuiffigisariaqarlugu.

2018-imi qineqqusaarnitsinni partiit (ataaseq minillugu) nunatta namminiilivinnissaa suliniutigissallugu oqariartuuterput ilalerpaat. Avissaartuuffittut annersaatut qaqugu namminiilivinnissaq pissanersoq ammalu nunatta aningaasaqarnera aporfiulluni.

 

Maannakkumut partii anginerit qanoq oqariartornissaat ileqqorissaarluta utaqqisimavarput. Præsident-ip Trump-ip nunatta pisiarerusullugu neqerooruteqarsimaneranut suut periarfissarsiorfigerusussinnaanerannik oqariartortoqarnissaanik.

Qanoq partiit aammalu inuiaqatigiit akornanni ataqatigiissumik naleraqarluta siunnerfeqaqatigiissinnaavugut nunatta namminiilivinnissaanut.

 

Partii Naleqqamiit soqutiginnilluta malinnaaffigaarput USA-p Danmark-imut “unnorujulikkaanik milliard dollars”-inik akiliilluni nunarput pisiarialersaarmangu. Tamassumap ersarilluinnartumik takutippaa nunarsuarmi pissaaneqarnerpaamiit ilisimaneqanngimmat qanoq “naalagaaffeqatigiinneq” isumaqarnersoq. Kalaallit Nunaat Danmark-ip nunasiaataatut paatsoorutaasinnaanera qularnanngitsumik aallaaveqarpoq, Danmark issittumi pissaanilittut imminut inissittarnera. Oqaatigineqarneq ajorami Kalaallit Nunaat issittumiittoq sinnerlugu akisussaaginnaraluarluni

Qanorluunniilli Danmark-ip 1953-imi FN peqqussutaa nunasiaateqarunnaaqqussut malikkusunnagu iliuuseqarsimagaluarnera, maannakkut nunarsuarmioqatitta Kalaallit Nunaat isigivaat. Uagullu kisitta aaliangersinnaallugu qanoq namminiilivinnermut piareersimanerluta, Danmark tikkuartorsinnaanngilarput iliuuseqaqqullugu. Massakkummi pisortatigoortumik USA nunatta illersornikkut isumannaarnera qulakkeerpaa, soorlu Island-imi.
Maannamut partiit tamavimmik NATO-mi ilaasortaanissaq anguniagaralugu eqqartoreeramikku aammalu USA-miit illersorneqarneq apeqqusernikuunngimmat, taamaasilluta namminiilivinnermut aqqummi apeqqut illersornissamut tunngasoq akineqareerpoq.

Aappaattut soqutiginartutut inissisimasoq tassaavoq USA-p nunatta anginaasaqarneratigut patajaattumik inissisimanissaa, ukiumut 4mia nunatta karsia tapeqartinniarlugu. Taamaasilluta Namminersorluta oqaluttuarisaanitsinni siullermeertumik innuttavut periarfissinneqarput. Maanna Danmark-ip tapiissutai ukiumut pinngitsoorsinnaanngorpavut.
Qularineqassanngilaq USA ajunngisaaginnarluni nunarput ikiorusullugu pissuseqartoq. Suna tamaat akeqarpoq. Soorlu aamma Danmark-ip ukiumut tapiissutaasa akeringaa nunatta kiffaanngissuseqannginnera. Soorlu EU-mut isumaqatigiissutit pituttuisut assigisarpassuilu. Tamaammat pingaarnersiuineq, sumi kiffaanngissuseqarnerpaajunersugut aammalu inuiaqatigiit pissarsiaqarfiginerpaasaat, ujartorneqartariaqarpoq. Taamaasineq isumaqannginnami ilaqutariippassuit attaviillu kipitinneqassasut nunatta Danmarkillu akornani.

 

1953-imi Nunarput Danmarkip tunngaviusumik inatsisaanut ilanngunneqarpoq, innuttaasut taasitinnagit. FN-ip peqqussutaa, nunasiaatit namminiilivinnissaanut periarfissiineq malinnagu.
Qanoq ukioq manna 2019 ingerlariaqqissinnaavugut, innuttaasut pissaaneqarnerat utertillugu. Imminnut upperalutik namminiilivinneq sapernagu nunarsuarmioqataalluta.

Danmark-imut ikioqqulluta danskit tunngaviusumik inatsisaannik peerniarsinnaanngilagut. Tamannami danskit naalakkersuisuiniit ersarissumik oqariartuutigineqarpoq. Kalaallit Nunaat nammineerluni illersornissakkut, sillimaniarnikkut aamma nunanut allanut politikki 1953-illi kingornali ingerlassinnaasimanngilarput utoqqatsissutigineqartarlunilu danskit tunngaviusumik inatsisaata tamanna periarfississinnaanngimagu. Taava qanoq ililluta misilittakkanik pisariaqartitatsinnik siunissami namminiilivissagutta ingerlassagatta? Danmark-immi puigorluinnarsimavaa Kalaallit Nunaata namminiilivinnissaa aamma sulissutigisariaqarlugu.

Taamaattumik danmark-ip tungaanut tikkuartuinerput unitsittariaqarparput immitsinnut qiviarluta aammalu suleqatigiinnikkut ataatsimoortumik anguniagarisariaqaraluarparput. Kalaallit Nunaat nammineersoq innuttaasut piffissanngorsoringunikku.

 

Taamaattumik Partii Naleqqamiit makku oqallisigineqartussatut saqqummiuppavut:

 

  1. USA-p neqeroorutaa toqqaannartumik tunineqarnissaanut naaggaarluta, taamaattorli oqaloqatigiinnissamut USA-p pisariaqartitai aammalu piumasaqaatai Kalaallit Nunaata namminiilivinnissaanut atorluartariaqarlutigu.
  2. Issittumi USA-p ataatsimoortumik naleqartitatsinnik aammalu suut iluarsiissutigineqarsinnaasut erseqqissaanermik, uanilu illersugaaneq nunap inoqqaavisa aammalu nunarsuarmioqataanermi eqqisseqatigiinnissamik qularnaarinninneq.
  3. Sunaana USA-mut uagut piumasaqaatiginiaripput illesornikkut aammalu aningaasarsiornikkut patajaatsumik nunarput qularnaarniarlugu, uanilu Kalaallit Nunaata aammalu USA akornani illersornissamik isumaqatigiissutip nunasiaataanerup nalaanili paarlatsissaanik isumaqatigiissusiorniartugut.
  4. Danskit Naalakkersuisuinik oqaloqatigiinneq aallartittariaqarpoq § 21 namminersornermut inatsit tunngavigalugu namminiilivinnissamut ikaarsaarnissatsinnut, minnerunngitsumik Danmark-ip Kalaallit Nunaanni akisussaafiinik atorunnaarsikkiartuaarnissaa.

 

Naliginnaasuutut isigineqarpoq Danmark-ip suliassani 1953-illi kingorna kisivissinnaasimanngikkaa, nunap nammineerluni pissaanilissuarnik danskit akulerutinngikkaluarlutik isumaqatigiinniarsinnaanermik aquummik tingusinissaminnik. Tamannali utoqqatsissutitut atorsinnaanngilarput, pissusissamisoorsinnaanngilarmi Danmark-ip sinnerluta nunanut allanut aammalu illersornissakkut politikkimik Kalaallit Nunaat sinnerlugu ingerlatsiuassasoq. Danmark-i issittuunngilaq. Danmark-i Europa-miippoq. Kalaallit Nunaata issittumiinnini aallaavigalugu nunat issittuni najugallit politikkia ingerlalliuk, danmark-i sinnerluguunngitsoq paarlattuanik nammineq soqutigisaminik taanna ingerlataqarli. Soorlu EU (EF) anisimasugut piffissanngorsimasoraara danskit “naalagaaffeqatigiinneraniit” anisariaqarluta. FN-ip piumasaqaataa naammassiniarli nunasiaateqarnerup atorunnaarsinneqarnissaa soorlu danmark-ip 1953-imi naammassiniarsinnaasimanngikkaa.

Oqaluttuarisaanitsinni ukiorpassuarni siunissamilu attaveqaqatigiissaagut naligiissumik nunat inissisimassallutik. Nunavut marluk NATO-mit illersorneqarlutik imaluunniit oqaatigilluaannarlugu USA-mik.

 

Partii Naleqqamiit namminiilivinnissatsinnut allat sulissutissagaatigut utaqqiinnarnianngilarput naak partii anginerit qineqqusaarnermi oqariartoraluartut namminiilivinnissaq kissaatigineqartoq oqariartuutitalugu. Taamaattumik isumaqarpugut oqallinneq ammasumik ingerlanneqassasoq, anguniakkatsinnik isertuussaqarata. Nunap innuttaanut imaluunniit danskit naalagaaffianut. Taamaattumik siunnersuutigaarput Naalakkersuisut danskit naalakkersuisunut oqariartuuteqassasut namminiilivinnissaq anguniarlugu sulissuteqalersimasugut. § 21 naapertorlugu, imatullu allaqqammat:
§ 21 inuiaat kalaallit namminiilivinnissaq namminneerlutik aalajangiiffigissavaat.

Partii tamarmik Inatsisartuni (ataaseq minillugu) namminiilivinnissaq qineqqusaarutigaat, tamannalu innuttaanit qinigaassutigalugu.

 

Ilanngullugu alloriarneq tulleq tassaasariaqarpoq amerikkamiut naalakkersuisuinik oqaloqateqalernissaq Naalagaaffiit innutanut pisinnaatitaaffii aammalu namminersornermut inatsimmi namminiilivinnissaq siunertaralugu ingerlasoqalermat aammalu oqaloqatigiinnissaq nunat marluk akornanni suleqatigiissutigineqassasoq. Nunap illersorneqarnissaa pinerullugu aammalu aningaasaqarnikkut patajaatsumik nunatsinni ingerlatsinikkut. Oqaloqatigiinnerit taamatut ittut aallaavigalugit, danskit naalagaaffiata qanoq sukkatigisumik aningaasaqarnikkut akisussaaffitsik annikillisarnissaat tunngavilersuutaasinnaallutik.

Ilanngullugu maluginiarsimavarput partiit ilaat nassuerutigisariaqaraat namminiilivinnissaq sulissutiginngimmassuk, paarlattuanilli “naalagaaffeqatigiinnerup“ nukittorsarneqarnissanik sulisoqartoq. Tamanna soorunami qinersinermi oqariartuuteqarsimanermut sumiginnaanerussaaq. Sumiginnaaneq qinersititsinermik salinneqarsinnaasoq aammalu nassuerutigineqarluni partiit namminiilivinnissamut apeqqummut sumiinnerlutik nalunaarutigissagaluaramikku.

 

USA-p Kalaallit Nunarput illersoreerpaa aammalu siunissami illersortuassallugu. Apeqqutaaginnarlunilu USA toqqaannartumik oqaloqatigisinnaaneripput maani nunami issittumiittuusugut, imaluunniit Danmark sinnerluta qulaatiinnarlutalu isumaqatigiinniartassanersoq.

 

Inussiarnersumik inuulluaqqusillunga

Pele Broberg

Inatsisartunut ilaasortaq Partii Naleraq, saaffigisassaq 48 35 36

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt