Siammarteruk

Tusagassiorfinnut nalunaarut

Pingaarnersiuisinnaannginneq

2018-imi Aningaasaqarnermut Naalakkersuisuullunga siunnersuuteqarama snescooterit ATV-llu akitsuutaarunnissaannut, aallavigisimavara aningaasalersugariigaanissaa.

Ajoraluartumik Demokraatit ikinnerussuteqarlutik Naalakkersuisutik piumasaqarfigivaat snescooterit ATV-llu akitsuutaarunnissaannut siunnersuutip tunuartinnissaanut. Kingornali upernaakkut 2019 aningaasalersorneqanngitsumik nammineq siunnersuuteqarlutik.

Maanna erserpoq Demokraatit snescooterinut ATV-nullu akitsuutip peernissaa aningaasalersorusukkaat peqqinnissaqarfimmi atuisut akiliisalernissaatigut, utoqqaat sipaarfiginiarneqarneritigut aammalu akitsuuterpassuit qaffaannarneratigut.

 

Assigusumik Inuit Ataqatigiit siunnersuuteqarsimavoq ATV akileraarutaanut appaanissamik, aamma aningaasalersorneqanngitsumik. Pingaarnerutissimavaat plug-in hybrid biilit, soorlu Porsche Cayenne E-Hybrid, aqqusinermi atuinerat allatulli pissanngitsoq akeqanngitsumik Nuummi ingerlaarnissaat. Ersarissumillu oqariartuutigalugu miguitsumik ingerlaneq tunngavilersuutiginagu, elbiilit qulakkeerumannginnamikkit siunissami akitsuuteqannginnissaat.

 

Partii Naleqqamiit naaperiaasimagaluaqaagut, partiit oqariartuutaat aallaavigalugit nalimmassaalluta siunnersuutinik, qulakkeerniarlugu snescooterit ATV-llu EM2019/165 siunnersuummiittut akitsuutaarunnissaat.
Danmarkimi elbiilit akitsuutaat 20%.imiit 40%-imut januarimi qaffalersoq, maani qulakkeerniarsimagaluarparput 0%-imiissasoq. Taassumalu qaavatigut susassaqartut biilinillu niuertartut oqariartuutaat plug-in hybrid akitsuutaat siunnersuutigisimavarput 15%-imut inississasoq. Innarliissanngimmanngooq niuernermut akitsuut taama annikitsigisoq.
Taannannguarluunniit ataatsimiititaliami isumaqatigiissutigineqarsinnaasimanngilaq, aali aningaasanut inatsimmi 2019 allaqqasoq januar 2020 aallarnerfigalugu akitsuusersorniartut.

Eqqussinermut akitsuutit elbiilit 0% aamma hybrid 15% oqimaaqasigiittitsinngimmata snescooterit ATV-llu akitsuutaarunnut, siunnersuutip aappaanik ilassusersimavakka.

 

Siunnersuut EM2019/166 Partii Naleqqamiit suaarutigisimavarput nunatsinni elbiilit 60 missaaniittut, aqqusinermut atuinerminnut akiliisalissasut, akileraarutaasut 50% nalinganik. Taamatuttaat hybrid biilit ukiumut akiliutigisassaat aqqusinermut atuinerminnut, akileraarutit allanut atuuttut 75%.ia akilertassallugu. Taamaasillutik batteereqaraluarlutik sipaarfigineqassallutik.

Aali aningaasanut inatsimmi 2019 isumaqatigiissutigineqareersimagaluartoq nunatsinni biilit 4000-it sinneqartut assigilerlugit akitsuuteqalersitsiniarlutik, tamannamininnguarluunniit isumaqataaffigineqanngilaq.

 

Akerlianik takusinnaavara ataatsimiititaliami siunnersuutigisimasara, snescooterit ATV-llu akitsuutaarunniissa ingerlanneqarmat, aningaasalersorlugu Aningaasanut Inatsimmi 2020.
Siunnersuutinni akitsuutaarussinissaq 1. Januar 2020 kissaatigineqarsimanngilaq, inatsisaagaluartoq akuerineqaruni atuutilertussaq. Pingaarnerutinneqarsimavoq aaliangiiffissatut siunnersuut, akisussaaffillu Naalakkersuisunut milorujunneqarnissaa kissaatigineqarsimalluni, aningaasalersornissaa allami ujartorneqaqqullugu.

 

Ataatsimiititaliap siunnersuut EM2019/165 itigartinnissaanut innersuussinermini (snescooterit ATV-llu akitsuutaarunnissaanik innersuussisoq), siunnersuut EM2019/166 allannguuserlugu piumasimavaat. Isertitaqarsitsilerusullutik landskarsimut, kisianni ajoraluartumik tamanna januarimiit atuutilissagaluarluni, aatsaat kingusinnerusukkut Naalakkersuisut snescooterit ATV-llu akitsuutaarunnissaannut siunnersuuteqassammata qulakkeersinnaanagu tassunga tuttarnissaat isertitat.
Partiit taamatut tukatsigisumik pingaarnersiusimanerat ajuusaarutigaarput Partii Naleqqamiit, sualummik naaperiaanerit taama annertutigisut pereersimagaluarmata qulakkeerniarlugu nunap inui akitsuutit annikinnerpaaffianiinnissaat.

 

Akisussaaffilittut isiginnginnakku aningaasalersornikuunngitsunik siunnersuutinik imaattunik saqqummiinissaq, peqataasinnaannginnamalu snescooterit ATV-llu akitsuutaarunnissaat peqqinnissaqarfimmi atuisunik akiliisitsisarnermik utoqqartagullu sipaarfigalugit akilersugassaanissaat, siunnersuutikka tunuartiinnartariaqarsimavakka.
Suli Partii Naleqqamiit akileraarutit akitsuutillu allanngornissaat, soorlu snescooterit ATV-llu, ajuusaarutigaarpullu partiit allat piumassuseqarsimanngimmata ilungersuutitta peqataaffiginissaat.

Paasisaqarnererusoqqikkuit, Pele Broberg attavigiuk.

 

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt