Naleqqamiit periarfississimagaluarpagut Naalakkersuisooqatigiit innuttaasut iluaqutissaanik suliaqarnissaat.
Qineqqusaarnermi “aatsaat taama pilluartigilissaagut” timitalernissaa utaqqisimagaluarparput. Maannali ersarissumik killiffik akuersaanagu nalunaarutigissavarput.
Nunatsinni partiit anginerit marluk aaqatigiillutik suleqatigiilluarnertik iluarisimaarinninnerat qiningaaffiullu tulliani aamma suleqatigiinniarnerat paasilluinnarparput, ajoraluartumilli aaliangiussaata kingunissaat innuttaasunut artukkiisut amerlatsikkaluttuinnarput.
Naleqqamiit Polaroil ingerlanneqarnera, aammalu qanoq sinneqartoorutaaniik kujataanut KNI ingerlataanut, amingartooruteqarfiusumut aningaasanik nakaatitsisarsimanerat maluginiarparput.
Ajoraluartumillu aningaasanik nuussuisarsimanerup takutippaa, KNI aammalu Polaroil, Naalakkersuisut akuerisaanik matoqqasumik ingerlatsineq atorlugu innuttaasunut akisunaarisarnera.
Tamanna unittariaqarpoq.
Naleqqamiit ammasumik ingerlatsisussaanissaq piumasaralugu, nunatsinnut orsussamik pisisarnerup akivia saqqummiunneqartalernissaa piumasaraarput.
Allaat eqqunngitsumik Polaroil nittartagaani akit sanilliussat takuneqarsinnaapput, assersuutitut taallugu 2020-mi Polaroil akia 4,50kr missaaniittoq sanilliunneqarmat Danmarkimi akia 12,50kr missaaniittoq.
Oqaluttuami takutinneqarusussimanngilaq Danmarkimi Benzin akia 12,50kr-iutillugu akit assigiinngitsut marluusut akivianut. 3,99kr aamma 5,12kr. Taamaasilluni 8,51kr tungaanut Danmarkimi akitsuutaallutik, nunatsinnilu akitsuuteqannginnatta sanilliunneqarsinnaanatik.
Ullumikkut orseraangatta akia takusinnaasatta iluaneereerpoq KNI 172mio ukiumut iluanaarutaa, aningaasartuuterpassuit ilanngaatigereerlugit. Aamma orsiiviuteqarlutik namminersortuusut iluanaarutissaa ilanngutereerlugu.
Sulisartut iningisartik maanna akisunerusumik kiassalissavaat, Naalakkersuisooqatigiit matoqqasumik ingerlatsinertik tamaviaarfiginerani.
Sulisitsisut atuisunut sulisuminnullu akiligassaq ingerlatissavaat, Naalakkersuisooqatigiit innuttaasut kaasarfianiit aallerlutik, politikkikkut aqutsinerlunnermi amingartoorfiusunut matussusiiniarneranni.
Naleqqamiit piffissanngorsoraarput Polaroil pisisarnerminut akivia saqqummiunnissaa, nunatsinnilu inoqarfiit pilersorneranut aningaasartuutit tamaasa saqqummiuttalernissaanut.
Taamaasillunilu aamma piffissanngorpoq Polaroil nunatsinni inuuniarneq akisoreertigisoq akerititaa minnerpaamiitittalernissaanik piumasaqarfigineqarnissaa.
Matoqqasumik ingerlatsiunnaarluta Naalakkersuisut aqutaat suliffeqarfik peqquneqarniarli akivia pisissutigisartagartik saqqummiuttalernissaanut. Taava ilumut pitsaanerpaamik innuttaasunut ingerlatsisoqarnersoq nalilerneqarsinnaasalissaaq.
Pele Broberg
Siulittaasoq Naleraq
Piviusut innersuussat:
https://polaroil.gl/polaroil-pillugu/akit/
https://www.drivkraftdanmark.dk/priser/benzin-95-oktan/
