Ersarissumik oqaatigissavara: Kikkut tamarmik Kalaallit Nunaanni najugaqartut naligiittumik katsorsartissinnaasussaapput.
Ajoraluartumik Inuit Ataqatigiit Folketingimi ilaasortaatitaat Avannaani qineqqusaarnitsinni eqqunngitsunik kanngunartumillu oqaaseqaqattaarpoq.
Inuit Ataqatigiit Folketingimi ilaasortaatitaat ilumuunngitsumik oqaqattaarpoq Naleraq uangalu isumaqartugut kalaallit kisiisa nakorsiarsinnaassasut, namminerlu eqqaavaa DNA-test-erineq ingerlanneqartassasoq. Aali uanga tamakkua ataasinnguamilluunniit taanikuunagit.
Toqqaannartumik piaarisumillu uukapaatitsiniarsarivoq, arlaleriarlungami sorsuutigerusutakka suunersut ersarissaraluarlugit. Massa oqaatsikka nammineq danskisut nutseraluarpakka oqariartuutikka paasilluarnissai qulakkeerusullugit.
Ersarissarpara peqqinnissaqarfimmut tunngatillugu Folketingimi sorsuutigerusutara tassaasoq: nunatsinni najuqartartut, danskit, svenskit, kalaallit, kikkuugaluaruniluunniit Danmarkimi katsortartittussaagunik, katsorsarneri Danmarkip akilertalissagaai.
Ukiut tamaasa kikkut tamarmik, danskiuguniluunniit kalaaliuguniluunniit nunatsinni najugaqartut Danmarkimi katsorsartitarnerannut 250 mio. kruunit, tassa milliardip sisamararterutaa, uagut Nunarput akilertarpai.
Inuit Ataqatigiit Folketingimi ilaasortaatitaat piaaraluni kinaassusermut tunngatilerlugu sangutitsinniaavoq, soorlu racisme taasaqattaarlugit naluuippasikkaluarlugu taanna suunersoq.
Naalagaaffeqatigiinnermik taaneqartartumiitsilluta tamatta danskisut innuttaassuseqarpugut. Peqqinnissiqaqarfippullu taamak ilungersortigisoq kalaallit danskillu nunatsinni najugaqartut Danmarkimi katsorsartitsikkiartornerat Danmark akiligassagai pissusissamisoorpoq.
Folketingimut peqqinnissaqarfimmut tunngasut qineqqusaarutigut tassaapput,
1. Peqqinnissaqarfimmut tunngatillugu Danmarkilu suleqatigiinnissaq, tassuunalu innuttaasut nunatsinni najugaqartut Danmarkimi katsortartikkiartortatut kikkuuguniluunniit Danmarkimut akilertillugu. Tassuunaatigut 250 mio. kruunit nunnatsinni peqqinnissaqarfipput ilungersortoq inerisarsinnaalissallugu.
2. Nunatsinni napparsimasut sapaatit akunnerit tallimat iluanni peqqinnissaqarfitsinni katsorsartinnerat aallartissinnaanngippat, Danmark-ip akiligaanik Danmark-imut katsorsartikkiartorsinnaanissaat suleqatigiissutiginiassallugu qulakkiissavarput. Behandlingsgaranti innuttaasunut tamanut atuutilersernissaa qulakkiissallugu.
Suli kunngeqarfimmiitilluta Danmarkip nunatsinni peqqinnissaqarfipput ilungersortoq suleqatiginissutiginissaa pissusissamisoorpoq.