Upernaakkut ataatsimiilluta aallartippugut.
Inatsisartut aningaasaliissutinut ilassutitut inatsisissaannut siunnersuut 2023 eqqartornerani tupaallaatigeqaarput Inuiat Ataqatigiinniit Akileraartarnermut aningaasaqarnermullu ataatsimiititaliap suleriaasiat maannamut atuuttoq nutarterneqalermat avaqqutiinnarlugu sulineq akuersaarlugu oqariartuuteqarmat.
Inatsisartuni ilaasortatut suleriuutsit atuuttut malinneqartuarnissaat, avaqqunneqarsinnaannginerallu apuunneqartuarput – taamaattumik Naleqqamiit partiit anginerniit suleriuutsit atuuttut malittariaqannginnerannik oqarituuteqarnerat paasisinnaanngilluinnarparput, ilami inatsit atuutut tamanut atuuttussaammata.
Nunarput ullut tamaasa inatsisit atuuttuniit ingerlanneqarpoq, innuttaasunut ilaatigut eqquinerluttunik. Inatsisit tamakku imaaliallaannaq allanngortinneqarsinnaaneq ajortut, maanna partiit anginerit imminnut iluaqusersorumallutik suleriuutsit atuuttut avaqqunniarsarigaat maluginiarparput tupigusuutigalugulu.
Assigiinnarpaa pinngitsaaliissumik utoqqalinersiaqarnissamik inatsit allanngortiinnarsinnaanagu, utoqqalinersiallip aappaasup isertitai apeqqutaajunnaarnissaat inatsit allanngoqqanngippat ajornarporooq, kisianni imminnut iluaquserniarlutik naalakkersuisooqatigiit suleriaatsimi akuerinikuusartik §8 imm. 2 unnuaannaq atorunnaarsissimavaat.
Qinikkat maligassiuisussaapput, qaffasinnerusumik imminnut inissittussaanngillat, tamanna ullumi Naleqqamiit akuerinagu nunap inui aallaavigalugu isummersorluta saqqummiivugut.