Sivisuumik sulisimalluta inuuneqarsimagutta, qilanaarisariaqarparput ataqqinartumik utoqqalinissarput soraarninngorsinnaanissarpullu. Amerlanerit angerlarsimaannarusullutik najugaqarusuttarput pisinnaajunnaarnissartik tikillugu, taamaalineranilu utoqqaat illuanut nuuttariaqalersarlutik. Utoqqalinermi pingaaruteqarpoq, kommunip tapersiilluarluni siunnersuilluarnissaa sullissinermi neqeroorutigisinnaasai ersersilluarlugit. Tamanna pisussanut ajunngitsumik misigisaqartitsisarpoq utoqqaap, ilaqutariit kommunellu akunnerminni ingerlataat pitsanngorsartuaraanni.

Kommunip aamma akisussaaffigaa qulakkeerniassallugu, utoqqarnut- paarisarialinnullu inissaateqassalluni, innarluutilinnut najoruminartunik inissiaqassasoq, pitsorluttunullu tikikkuminassuseq pitsaasuusariaqartoq. Soorunami utoqqartavut utoqqaat inigisartagaannut nuuppata, imaluunniit utoqqaat illuanut nuuppata taava inigisimasaat allanut tunniunneqarsinnaanngussapput, tamakkulu pillugit aamma naammaginartumik ikiorserneqarsinnaasussaapput. Naleqqap kissaatigaa utoqqalinersiallit utoqqaallu tapersersuisu- mik susassaqartinneqarnissaat qulakkeerneqassasoq. Illoqarfiit inoqarfiillu ilaatigut utoqqaat peqatigiiffiinik aaqqissuillaqqipput najukkamilu susassaqartitsisarlutik. Naleqqap kissaatigaa utoqqaat peqatigiiffii suleqatigilluarneqassasut, isumaqarluartunik susassaqartitsinerit ataatsimoorfiusullu, utoqqarnut ikiuiniarnitsinni unamminartunut ataatsimoorfeqarnissarput pisariaqarmat.